لاہور(جھنگ تیز داٹ کام)لاہور ہائیکورٹ نے پنجاب حکومت کو مال روڈ پر احتجاج پر پابندی کے احکامات پر عمل درآمد کے لئے قانون سازی کی ہدایت کر دی اور اس مقصد کے لئے حکومتی استدعا منظور کرتے ہوئے مہلت دے دی ہے۔
جسٹس امین الدین خان کی سربراہی میں تین رکنی فل بنچ نے مال روڈ پر احتجاج کی پابندی پر عمل درآمد نہ کرانے کے خلاف دائردرخواستوں پر سماعت کی تو پنجاب حکومت کے وکیل نے موقف اختیار کیا کہ لیڈیز ہیلتھ ورکرز کا احتجاج ختم ہوگیا ہے، تین فل بنچ نے استفسار کیا کہ مال روڈ پر احتجاج کی پابندی کے بارے میں کیا قانون سازی کی گئی ہے ؟جس پر پنجاب حکومت کے وکیل نے استدعا کی کہ قانون سازی کے لئے وقت دیا جائے، سماعت کے دوران جسٹس شاہد جمیل خان نے حیرت کا اظہار کیا کہ احتجاج چیئرنگ کراس پر ہوتا ہے لیکن گورنر ہاﺅس سے راستے بند کر دیتے ہیں۔ فل بنچ کے استفسار پر پنجاب حکومت کے وکیل نے بتایا کہ احتجاج ناصر باغ کو مخصوص کیا گیا ہے اور اس مقصد کے لئے ناصر باغ میں مظاہرین کے لئے سہولیات رکھی ہیں، پنجاب حکومت کے وکیل نے عدالتی استفسار پر یہ بھی بتایا کہ مال روڈ پر احتجاج کرنے والے کی کوریج کو نشر نہ کرنے کے لئے بھی متعلقہ حکام سے رجوع کیا ہے، لاہور ہائیکورٹ کے فل بنچ نے پنجاب حکومت کو ہدایت کی کہ مال روڈ پر احتجاج کو روکنے کے لئے قانون سازی کی جائے، فل بنچ نے مزید کارروائی 19 اپریل تک ملتوی کر دی ۔
0 تبصرے:
ایک تبصرہ شائع کریں