جھنگ ( جھنگ تیز نیوز):موسم گرما کی شدت میں اضافہ کے باوجود جھنگ میں گھریلو صارفین کیلئے گیس کی بدترین لوڈ شیڈنگ عروج پر پہنچ گئی ہے جبکہ اس کے برعکس محکمانہ بھتہ خوری کے باعث شہرکے تمام بڑے ہوٹلوں ، سی این جی سٹیشنزاور کمرشل صارفین کو سوئی گیس کی نان سٹاپ سپلائی جاری ہے نیزسیاسی بنیادوں سمیت ارجنٹ فیس جمع کروانے والے صارفین کو دھڑا دھڑ نئے گیس کنکشنز فراہم کئے جارہے ہیں۔دوسری جانب گیس سپلائی کے اوقات میں گیس پریشر میں کمی اور بلاجواز و غیر اعلانیہ لوڈ شیڈنگ کا عفریت بازار کھیتیانوالہ، محلہ سلطان والا، بستی ارائیاں والی،محلہ باغوالہ، محلہ جوگیانوالہ، محلہ چنبیلی مارکیٹ، محلہ بھبھرانہ، دھپ سڑی،محلہ بڈھیوالہ، بلاق شاہ و سیٹلائٹ ٹاؤن کے لاکھوں گھریلو صارفین کیلئے وبال جان بن گیا ہے جبکہ گیس صارفین کی تعداد میں زبردست اضافہ کے باوجود گیس کے پریشر میں ایک پاؤنڈ کا بھی اضافہ نہیں کیاگیا اور گیس کا موجودہ پریشر شہریوں کی ضرورت کیلئے ناکافی ہے لہٰذا اگر پریشر میں مطلوبہ ضرورت کے مطابق اضافہ کردیاجائے تو شہریوں کی مشکلات میں کمی لائی جاسکتی ہے۔ صارفین نے بتایاکہ محکمہ سوئی ناردرن گیس جھنگ کے کرپٹ انچارج سمیت بعض دیگر اہلکاروں کی ملی بھگت سے چند مقامات پر اکثر کمرشل و گھریلو صارفین کمپریسر لگا کر غیر قانونی طور پر اپنے پریشر میں اضافہ کر رہے ہیں اور ایک کمپریسر کئی گھروں کی گیس کھینچنے کا موجب بن رہاہے لیکن نااہل، بدعنوان، حرام خور اہلکاروں کی ملی بھگت کے باعث اس سلسلہ میں کوئی کاروائی عمل میں نہ لائی جارہی ہے ۔دریں اثناء سوئی ناردرن گیس پائپ لائنز لمیٹڈ جھنگ کی غیر اعلانیہ لوڈ شیڈنگ اور گھریلو صارفین کیلئے فراہم کردہ گیس کا پریشر نہ ہونے پر ہزاروں صارفین سراپا احتجاج بن گئے ہیں جبکہ رات کو 9 بجے سے لیکر صبح 6 بجے تک اور دن کے بعض دیگر اوقات میں بھی گیس کی بندش اور نہ ہونے کے برابر پریشر نے خواتین خانہ کابلڈ پریشر ہائی کردیاہے نیز عوام نے گھریلو صارفین کیلئے گیس کاپریشر بڑھانے اور غیر اعلانیہ لوڈ شیڈنگ فوری بند کرنے کامطالبہ کیاہے ۔صارفین نے بتایاکہ ایک طرف حکومت گھریلو صارفین کو گیس کی بلاتعطل فراہمی کے بلند بانگ دعو ے کر رہی ہے مگر اس کے برعکس جھنگ میں سوئی ناردرن گیس کے مبینہ کرپٹ و نااہل افسران کی ملی بھگت سے الٹی گنگابہہ رہی ہے ۔ انہوں نے بتایاکہ حکومتی پالیسی کے برعکس سوئی گیس جھنگ کے حکام مذکورہ علاقوں میں گیس کی غیر اعلانیہ لوڈ شیڈنگ کر رہے ہیں اور عین اس وقت جب رات کے کھانے کی تیاری کا وقت ہوتاہے گیس بندکردی جاتی ہے یہی حال دن کے باقی اوقات کار میں بھی ہوتا ہے۔ انہوں نے کہاکہ اگر کسی جگہ پر گیس سپلائی بھی کی جاتی ہے تو اس کا پریشرنہ ہونے کے برابر ہوتاہے جس پر کھانا پکانا کسی بھی صورت ممکن نہیں۔انہوں نے کہا کہ بھاری بھتہ کے عوض سی این جی سٹیشنوں کو فل پریشر کے ساتھ تمام دن گیس کی فراہمی کا عمل جاری ہے حالانکہ اس کا عام افراد کو کوئی فائدہ نہیں کیونکہ ویگن مالکان گیس ڈلوانے کے باوجود مسافروں سے پٹرول کا کرایہ وصول کر رہے ہیں ۔ انہوں نے کہاکہ سوئی ناردرن گیس جھنگ کے کرپٹ حکام مبینہ طور پر گیس چوری کروانے کے مرتکب بھی ہورہے ہیں اور جہاں سے بھاری منتھلیاں ملتی ہیں وہاں صنعتوں ، گلی محلوں میں قائم چھوٹے کارخانوں ،سی این جی سٹیشنز، کمرشل سیکٹر ، ہوٹلوں وغیرہ کو تو فل پریشر کے ساتھ گیس کی سپلائی کی جارہی ہے جبکہ گھریلو صارفین کو مسلسل نظر انداز کیا جا رہاہے۔انہوں نے گھریلو صارفین کیلئے سوئی گیس کی لوڈ شیڈنگ فوری ختم کرنے کا مطالبہ کیا ہے۔
0 تبصرے:
ایک تبصرہ شائع کریں