جھنگ( جھنگ تیز)ڈپٹی کمشنر مدثر ریاض ملک نے محکمہ انہار کے انجینئرز اور دیگر متعلقہ افسران سے کہا ہے کہ متوقع سیلابی صورتحال کے پیش نظر دریائے چناب اور جہلم کے حفاظتی بندوں کی دیکھ بھال اور مانیٹرنگ کے کام کوہر قیمت پر یقینی بنائیں جبکہ تمام متعلقہ محکمے مربوط رابطے کے تحت موقع پر موجود رہ کر کمی و خامیوں کو فی الفوردور کریں۔ اس ضمن میں کسی قسم کی کوتاہی اور لاپرواہی ہرگز برداشت نہیں کی جائیگی یہ بات انہوں نے فلڈ سیزن 2018ء کے انتظامات کے حوالہ سے خصوصی اجلاس کی صدارت کرتے ہوئے کہی۔ اس موقع پرڈسٹرکٹ پولیس آفیسر لیاقت علی ملک، چیئر مین ضلع کونسل بابر علی خان سیال،ایڈیشنل ڈپٹی کمشنر جنرل محمد آصف اقبال ، ایڈیشنل ڈپٹی کمشنر ریونیو سجاد احمد خان، ، چاروں تحصیلوں کے اسسٹنٹ کمشنرز، ڈی ڈی ایم اے اور محکمہ انہار کے افسران سمیت دیگر متعلقہ محکموں کے افسران بھی موجود تھے۔ اجلاس کے دوران دریائے چناب اور جہلم کے ضلع جھنگ میں واقع حفاظتی بندوں کی پختگی اور معمول کی سالانہ مرمت کے حوالہ سے مکمل کئے گئے اقدامات بارے تفصیلی طور پر آگاہ کیا گیا اوربتایا کہ دریائے چناب کے ریواز،ٹھٹھہ ماہلہ، وجھلانہ اور دیگر حفاظتی بندمکمل طور پر محفوظ اور پختہ ہیں۔ڈپٹی کمشنر نے تمام تحصیلوں کے اسسٹنٹ کمشنروں کو ہدایت جاری کرتے ہوئے کہا کہ وہ محکمہ انہار کے افسران سے حفاظتی بندوں کی صورتحال کے جائزہ کے لئے باہمی رابطہ کو مزید موثر بنائیں اور اس ضمن میں انہیں بروقت آگاہی فراہم کی جاتی رہے۔قبل ازیں دریائے چناب اور دریائے جہلم میں پانی کے اتار چڑھاؤ اور ہیڈ تریموں پر پانی کے اخراج کی سطح کے بارے مکمل بریفنگ دی گئی۔
0 تبصرے:
ایک تبصرہ شائع کریں